Treoir maidir le Scóipeáil Measúnachta Tionchair Timpeallachta faoin Tríú Treoir maidir le Fuinneamh In-athnuaite Aguisín

Aguisín:

Aguisín 1 - Airteagal 94 – Ábhar na tuarascála ar mheasúnacht tionchair timpeallachta

Aguisín 2 - Comhlachtaí Forordaithe faoi Airteagal 213 de na Rialacháin um Pleanáil agus Forbairt, 2001, arna leasú. 

Aguisín 3 - Sceideal (Na Rialacháin um Pleanáil agus Forbairt, 2001, arna leasú)

Aguisín 4 - Alt 233 den Acht um Pleanáil agus Forbairt, 2024

Aguisín 5 - Samplaí de Thuarascálacha Scóipeála
 

Aguisín 2 - Comhlachtaí Forordaithe faoi Airteagal 213 de na Rialacháin um Pleanáil agus Forbairt, 2001, arna leasú. 

Is iad seo a leanas na comhlachtaí forordaithe atá leagtha amach in Airteagal 213(1): 

a) an tAire Comhshaoil, Oidhreachta agus Rialtais Áitiúil, 
(b) an tAire Cumarsáide, Mara agus Acmhainní Nádúrtha, 
(c) an t-údarás pleanála nó na húdaráis phleanála sa limistéar nó sna limistéir ina mbeartaítear an fhorbairt bheartaithe a shuíomh, 
(d) an tÚdarás um Bóithre Náisiúnta, 
(e) i gcás go bhfuil an talamh nó an déanmhas suite i limistéar taitneamhachta speisialta, cibé acu a daingníodh nó nár daingníodh ordú i leith an limistéir sin faoi alt 203 (nó cibé acu a mheastar nó nach meastar ordú a bheith daingnithe amhlaidh faoi alt 268(1)(c)) den Acht, nó go bhféadfadh forbairt nó coinneáil an déanmhais bac a chur ar aon radharc nó aon amharc a bhfuil fiúntas speisialta taitneamhachta nó spéisiúlacht speisialta ag baint leis – an Chomhairle Ealaíon, Fáilte Éireann agus an Taisce - an tIontaobhas Náisiúnta d’Éirinn, 
(f) i gcás go bhféadfadh an fhorbairt bac a chur, nó cur isteach, ar luach aon taitneamhachta turasóireachta nó ar aon oibreacha taitneamhachta turasóireachta – Fáilte Éireann, 
(g) i gcás, maidir leis an bhforbairt— 
(i) gurbh é a bheadh i gceist léi oibreacha a dhéanamh ar dhéanmhas cosanta nó ar dhéanmhas cosanta beartaithe, nó ar an taobh amuigh de dhéanmhas atá suite laistigh de limistéar caomhantais ailtireachta, 
(ii) go bhféadfadh sí cur isteach ar an gcuma atá ar dhéanmhas dá dtagraítear i bhfomhír (i), 
(iii) go bhféadfadh sí difear a dhéanamh do na nithe seo a leanas nó a bheith róghar dóibh— 
(I) uaimh, láithreán, gné nó rud eile is ábhar spéise ó thaobh seandálaíochta, geolaíochta, eolaíochta, éiceolaíochta nó staire, 
(II) séadchomhartha nó áit atá taifeadta faoi alt 12 d’Acht na Séadchomharthaí Náisiúnta (Leasú), 1994 (Uimh. 17 de 1994), 
(III) séadchomhartha stairiúil nó limistéar seandálaíochta atá taifeadta i gClár na Séadchomharthaí Stairiúla faoi alt 5 d’Acht na Séadchomharthaí Náisiúnta (Leasú), 1987 (Uimh. 17 de 1987), 
(IV) séadchomhartha náisiúnta atá faoi úinéireacht nó faoi chaomhnóireacht an Aire faoi Achtanna na Séadchomharthaí Náisiúnta, 1930 go 1994, 
nó 
(iv) go bhféadfadh sí bac a chur ar aon scéim chun feabhas a chur ar thimpeallacht aon déanmhais, aon áite, aon ghné nó aon ruda dá dtagraítear i bhfomhír (iii) nó ar aon mhodh rochtana air nó uirthi, 
(h) i gcás go bhféadfadh an fhorbairt difear a dhéanamh do limistéar aon údaráis áitiúil - an t-údarás áitiúil sin, 
(i) i gcás nach mbeadh an fhorbairt i gcomhréir le haon treoirlínte pleanála réigiúnaí (nó le haon chuspóir díobh) de chuid údaráis réigiúnaigh nó go sáródh sí go hábhartha iad – an t-údarás réigiúnach sin, 
(j) i gcás, maidir leis an bhforbairt— 
(i) go bhféadfadh sí a bheith ina cúis le hastógáil shuntasach uisce ó uiscí dromchla nó ó screamhuiscí, nó le huisce suntasach a chur leo, cibé acu a tharlaíonn sé sin go nádúrtha nó go saorga, 
(ii) go bhféadfadh sí a bheith ina cúis le scaoileadh suntasach ábhar truaillithe nó ábhar eile isteach in uiscí den sórt sin nó gur dóigh go mbeidh sí ina cúis le truailliú tromchúiseach uisce nó le baol truaillithe den sórt sin, nó 
(iii) gurbh é a bheadh i gceist léi oibreacha a dhéanamh i mbruacha na n-uiscí sin, thar na bruacha sin, feadh na mbruach sin nó in aice leis na bruacha sin, nó ar aon déanmhas i mbruacha na n-uiscí sin, thar na bruacha sin nó feadh na mbruach sin, arbh oibreacha iad a bhféadfadh éifeacht ábhartha a bheith acu ar na huiscí – Iascach Intíre Éireann agus, in aon chás ina bhfuil na huiscí lena mbaineann liostaithe i gCuid 1 d’Iarscríbhinn 1 a ghabhann leis an Sceideal a ghabhann leis an Acht um Chomhaontú na Breataine-na hÉireann, 1999 (Uimh. 1 de 1999) – Uiscebhealaí Éireann, 
(k) i gcás go bhféadfadh an fhorbairt sábháilteacht aerárthaí, nó loingseoireacht shábháilte éifeachtúil aerárthaí, a chur i mbaol nó cur isteach uirthi – Údarás Eitlíochta na hÉireann, 
(l) i gcás go bhféadfadh an fhorbairt cur isteach ar oibriú agus forbairt aon aerfoirt cheadúnaithe, nach lú a thrácht bliantúil ná 1 mhilliún gluaiseacht paisinéirí – oibritheoir an aerfoirt, 
(m) i gcás go bhféadfadh tionchar a bheith ag an bhforbairt ar iompar de bhus nó d’iarnród – Córas Iompair Éireann agus an Ghníomhaireacht um Fháil Iarnróid, de réir mar is cuí, 
(n) i gcás go bhféadfadh tionchar suntasach a bheith ag an bhforbairt ar iompar de mhuir is tír i Mórlimistéar Bhaile Átha Cliath – Oifig Iompair Bhaile Átha Cliath (nó aon chomhlacht a chuirfear in ionad na hoifige sin), 
(o) i gcás go bhféadfadh tionchar suntasach a bheith ag an bhforbairt ar iompar nó ar loingseoireacht mhuirí – an tAire Iompair, 
(p) i gcás go mbaineann an fhorbairt le gníomhaíocht, nó go bhfuil sí chun críocha gníomhaíochta, a bhfuil gá le ceadúnas um rialú comhtháite ar thruailliú nó le ceadúnas dramhaíola ina leith – an Ghníomhaireacht um Chaomhnú Comhshaoil; 
(q) i gcás go bhféadfadh éifeachtaí suntasacha a bheith ag an bhforbairt i ndáil le caomhnú an dúlra – an Chomhairle Oidhreachta agus an Taisce - an tIontaobhas Náisiúnta d’Éirinn, 
(r) i gcás go bhfuil an fhorbairt suite i limistéar Gaeltachta agus gur dealraitheach don Bhord go bhféadfadh sí difear ábhartha a dhéanamh d’oidhreacht teanga agus chultúrtha na Gaeltachta, lena n-áirítear an Ghaeilge a chur chun cinn mar theanga an phobail – an tAire Gnóthaí Pobail, Tuaithe agus Gaeltachta agus Údarás na Gaeltachta, 
(s) i gcás go bhfuil an fhorbairt suite i gcóngaracht monarchan pléascán, armlainne stórála nó stórais pléascán údaráis áitiúil – an tAire Dlí agus Cirt, Comhionannais agus Athchóirithe Dlí, 
(t) i gcás go bhféadfadh foraoisiú tosaigh nó baint foraoise airde leathanduillí a bheith mar thoradh ar an iarratas, nó go gceanglaítear foraoisiú tosaigh nó baint foraoise airde leathanduillí leis an iarratas – an tAire Talmhaíochta agus Bia agus an Chomhairle Oidhreachta, 
(u) i gcás go bhféadfadh éifeachtaí suntasacha a bheith ag an bhforbairt ar an tsláinte phoiblí – Feidhmeannacht na Seirbhíse Sláinte, 
(v) i gcás go mbaineann an t-iarratas le bonneagar fuinnimh a fhorbairt nó go bhféadfadh tionchar a bheith aige ar bhonneagar fuinnimh – an Coimisiún um Rialáil Fuinnimh, agus  
(w) i gcás, maidir leis an bhforbairt— 
(i) go bhféadfadh sí a bheith ina cúis le méadú suntasach ar an méid tráchta nó ar an gcineál tráchta (lena n-áirítear trácht tógála) a théann faoi bhun droichead iarnróid atá srianta ó thaobh airde de, nó a úsáideann crosaire comhréidh iarnróid, nó droichead thar iarnród, 
(ii) go bhféadfadh, mar gheall ar a gaireacht d’iarnród, tionchar a bheith aici ar shláine struchtúrach aon bhonneagair iarnróid le linn an fhorbairt a thógáil, nó
(iii) go bhféadfadh sí oibriú sábháilte aon iarnróid a chur i mbaol nó cur isteach air, le linn na tógála nó ina diaidh 
– an t-oibritheoir iarnróid, an Coimisiún Sábháilteachta Iarnróid agus, i gcás forbairt a bhféadfadh tionchar a bheith aici ar iarnród éadrom nó ar mheitreo, an Ghníomhaireacht um Fháil Iarnróid, 
(x) Uisce Éireann. 

(2) Léireofar in aon fhógra chuig comhlachtaí forordaithe faoi ailt 37E(3)(c), 181A(3)(b), 182A(4)(a) nó 182C(4)(a) na cineálacha cinntí a fhéadfaidh an Bord a dhéanamh i ndáil leis an iarratas, agus áireofar ann cóip amháin den iarratas agus den tuarascáil ar mheasúnacht tionchair timpeallachta agus, i gcás go mbeidh ráiteas tionchair Natura ag gabháil leis an iarratas, den ráiteas tionchair Natura (nó, i gcás go dtoileoidh an duine nó an comhlacht le faisnéis a fháil san fhoirm seo, i bhfoirm leictreonach). 

(3) Féadfaidh an Bord, tráth ar bith, a cheangal ar an iarratasóir cóipeanna nó cóipeanna breise d’iarratas agus de thuarascáil ar mheasúnacht tionchair timpeallachta agus, i gcás go mbeidh ráiteas tionchair Natura ag gabháil leis an iarratas, den ráiteas tionchair Natura (lena n-áirítear cóipeanna i bhfoirm leictreonach) a sheoladh chuig aon chomhlacht nó aon duine a chinnfidh sé (béim curtha leis).